ජල විදුලිබලාගාර ආශ්රීත ජලාශවල ජලය වාන්දමන සහ රටතුළ ඕනෑ තරම් ගල්අගුරු තිබෙන මේ දිනවල ලංකා විදුලිබල මණ්ඩලය පෞද්ගලික බලාගාරවලින් විදුලිය මිලදී ගෙන ඇති බවත් ආණ්ඩු මාරුවුවද විදුලිබල මණ්ඩලය තුළ විදුලි මාෆියාව ක්රියාත්මකවන බවත් ලංකා විදුලිබල මණ්ඩල තාක්ෂණික ඉංජිනේරු හා අධිකාරී සංගමයේ උප සභාපති නන්දන උදයකුමාර පවසනවා.
විදුලිබල මණ්ඩලයේ උද්ගතවී ඇති අර්බුදකාරී තත්වය පිළිබඳව කරුණු දැක්වීම සඳහා ඊයේ (10) කොළඹදී පැවති විශේෂ මාධ්ය හමුවේදී ඔහු මේ බව සඳහන් කළා.
පෞද්ගලික බලාගාරවලින් විදුලිය මිලදී ගැනීමේ උපක්රමයක් ලෙස නොරොච්චෝලේ තාප විදුලිබලාගාරයේ එක විදුලි ජනන යන්ත්රයක් උපරිම ධාරිතාවයෙන් ක්රියාත්මක නොමැති බවත් එම මණ්ඩලය තුළ දීර්ඝ කාලයක සිට ක්රියාත්මක විදුලි මාෆියාව නැවතත් හිස ඔසවා ඇති බවත් නන්දන උදයකුමාර පවසනවා.
විදුලි ගාස්තු ඉහළ යෑමට ද මෙම විදුලි මාෆියාව ප්රධාන කරුණක් බවට පත්ව ඇති බවත් ජල විදුලියෙන් සහ ගල්අඟුරු භාවිතයෙන් විදුලිය ජනනය කිරීමේ හැකියාව තිබීයදී පෞද්ගලික අංශයෙන් විදුලිය මිලදී ගැනීම විශාල නාස්තියක් බවත් ඔහු සඳහන් කළා.
විදුලිබල මණ්ඩලයේ නිලධාරීන් එසේ කළහොත් ලබන වසරේ පෙබරවාරි සහ මාර්තු වන විට ඇතිවන වියළි කාලගුණ තත්වයේදී විදුලිය මිලදී ගැනීමට මණ්ඩලයට මුදල් නොමැතිවන බවත් එසේ වුවහොත් නැවතත් පැය 04 – 05ක විදුලිය කප්පාදුවක් සිදුවන බවයි ඔහු වැඩිදුරටත් පවසා සිටියේ.
source :- https://tinyurl.com/3upafvja
