ඉන්දීය ප්රකෝටිපති ව්යාපාරික ගෞතම් අදානිගේ නායකත්වයෙන් යුත් ‘අදානි’ සමූහ ව්යාපාරය තමන් ශ්රී ලංකාවේ වරාය ව්යාපෘතියකට අරමුදල් සැපයීම සඳහා තමන්ගේම සම්පත් භාවිතා කරන බවත් එක්සත් ජනපද අරමුදල් ලබා නොගන්නා බවත් ඊයේ (10) ප්රකාශ කළ බව ඉන්දීය මාධ්ය වාර්තා කරනවා.
ඒ අනුව Adani Ports and SEZ Ltd පවසා ඇත්තේ අදාළ ව්යාපෘතිය ලබන වසර මුලදී ආරම්භ කිරීමට නියමිතව ඇති බවත්, සිය සමාගම එහි ප්රාග්ධන කළමනාකරණ උපාය මාර්ගයට අනුකූලව “අභ්යන්තර උපචිත” හරහා ක්රියාත්මක ව්යාපෘතියට අරමුදල් සපයන බවයි.
මේ අතර එම සමාගම පවසා ඇත්තේ 2023 වසරේ දී “එක්සත් ජනපද ජාත්යන්තර සංවර්ධන මූල්ය සංස්ථාවෙන් (DFC) මූල්යකරණය සඳහා වූ ඉල්ලීම” කළ ගත් බවත් පසුව එය ඉන් ඉවත් කර ගත් බවයි.
කොළඹ වරායේ බටහිර පර්යන්තය (CWIT) නමින් හැඳින්වෙන ගැඹුරු ජල බහාලුම් පර්යන්තයක් සංවර්ධනය කිරීම, ඉදිකිරීම සහ ක්රියාත්මක කිරීම සඳහා ආධාර කිරීම සඳහා එක්සත් ජනපද ජාත්යන්තර සංවර්ධන මූල්ය සංස්ථාව පසුගිය වසරේ නොවැම්බර් මාසයේ දී ඩොලර් මිලියන 553 ක ණයක් ලබා දීමට එකඟ වී තිබුණා.
CWIT සංවර්ධනය කරනු ලබන්නේ Adani Ports, John Keells Holdings Plc සහ Sri Lanka Port Authority (SLPA) හි එකමුතුවක් විසින්.
දකුණු ආසියානු කලාපය තුළ වර්ධනය වන චීනයේ බලපෑමට ප්රතිරෝධයක් ලෙස එක්සත් ජනපද ජාත්යන්තර සංවර්ධන මූල්ය සංස්ථාවේ මූල්යකරණ වැඩසටහනේ කොටසක් වශයෙන් අදානි සමාගමට මෙම අවස්ථාව උදා වී තිබුණු බවයි එම මාධ්ය වාර්තා සඳහන් කරන්නේ.
කෙසේ වෙතත්, එක්සත් ජනපද ජාත්යන්තර සංවර්ධන මූල්ය සංස්ථාව විසින් Adani සහ SLPA අතර ගිවිසුම ඔවුන්ගේ කොන්දේසිවලට අනුකූල වන පරිදි සංශෝධනය කරන ලෙස ඉල්ලා සිටීමෙන් පසුව ණය ක්රියාවලිය ඇනහිට ඇති අතර, එය ශ්රී ලංකාවේ නීතිපතිවරයා විසින් සමාලෝචනයට ලක් කර ඇති බවත් එම මාධ්ය වාර්තාවේ වැඩිදුරටත් සඳහන්.
මේ අතර එම ඉන්දීය මාධ්ය වාර්තා සිය අභ්යන්තර ආරංචි මාර්ග උපුටා දක්වමින් සඳහන් කළේ, ව්යාපෘතිය අවසන් වීමට ආසන්න බැවින්, ව්යාපාරයෙන් සියයට 51ක් හිමි Adani Ports, එක්සත් ජනපද ජාත්යන්තර සංවර්ධන මූල්ය සංස්ථාව වෙතින් අරමුදල් නොමැතිව ව්යාපෘතිය ඉදිරියට ගෙන යාමට තෝරා ගත් බවයි.
කෙසේ නමුත් Adani සමූහ ව්යාපාරයේ විධායකයින්ට එරෙහිව එල්ල වී ඇති අල්ලස් චෝදනාවල ප්රතිවිපාක සක්රීයව තක්සේරු කරමින් සිටින බව එක්සත් ජනපද නියෝජිතායතනය මෑතකදී ප්රකාශ කර තිබුණා.
මේ අතර අදාළ මාධ්ය වාර්තා සඳහන් කරන්නේ අදානි සමූහය සියලු චෝදනා පදනම් විරහිත බව ප්රතික්ෂේප කර ඇති අතර හැකි සෑම නීතිමය පිළිසරණක් අනුගමනය කරන බවට ද ප්රතිඥා දී ඇති බවයි.
කොළඹ වරාය ඉන්දියන් සාගරයේ විශාලතම සහ කාර්යබහුලම ප්රති නැව්ගත කිරීමේ වරාය වන අතර එය 2021 වසරේ සිට සියයට 90කට වඩා වැඩි ප්රයෝජනයකින් ක්රියාත්මක වෙමින් අමතර ධාරිතාවක් අවශ්ය බව සංඥා කරනවා.
තව ද මෙම ව්යාපෘතියේ පළමු අදියර 2025 වසරේ පළමු කාර්තුව වන විට වාණිජමය වශයෙන් ක්රියාත්මක වීමට නියමිත අතර මෙම නව පර්යන්තය ප්රධාන නැව් මාර්ගවල ශ්රී ලංකාව ප්රමුඛ ස්ථානය කරගනිමින්, ප්රසාරණය වන වෙලඳපොලවල්වලට සමීප වීම ප්රයෝජනයට ගනිමින් බෙංගාල බොක්ක ආශ්රිතව වර්ධනය වන ආර්ථිකයන් සඳහා පහසුකම් සපයනවා.
කොළඹ වරායේ බටහිර පර්යන්තය (CWIT) ව්යාපෘතිය 2021 සැප්තැම්බර් මාසයේදී ආරම්භ කරන ලද අතර, Adani Ports විසින් කොළඹ වරායේ හැකියාවන් පුළුල් කිරීම සඳහා USD මිලියන 700කට අධික මුදලක් ආයෝජනය කිරීමට එකඟ වූ අතර, ශ්රී ලංකා වරාය අධිකාරිය සහ John Keells Holdings සමඟ ගිවිසුමක් අත්සන් කරනු ලැබුවා.
CWIT යනු ශ්රී ලංකාවේ විශාලතම සහ ගැඹුරුම බහාලුම් පර්යන්තය වන අතර එහි දිග මීටර් 1,400 ක් සහ එහි ගැඹුර මීටර් 20ක්.
source :- https://tinyurl.com/3m7dr9ta
